Gwadar District Health Committee: Ghair hazir tibbi amle ke khilaf karrawai, baghair license medical store seal karne ki hidayat

Gwadar: Deputy Commissioner Naqeebullah Kakar ki hidayat par Additional Deputy Commissioner Revenue Zahoor Ahmed Baloch ki zer-e-sadarat District Health Committee ka ijlas munaqid hua, jis mein zila bhar mein sehat-e-amma ki surat-e-haal, tibbi sahuliyat ki faraahmi, idaraati karkardagi aur darpesh masail ke hal se mutaliq umoor ka tafseeli jaiza liya gaya.

Ijlas mein zilai officer Sehat Dr Yasir, Mir Abdul Ghafoor Teaching Hospital ke numainda Dr Jonbad Baloch, Deputy DHO Dr Farooq Baloch, CEO GDA Hospital Dr Nasir Sheikh, XEN WAPDA, District Manager PPHI Dr Murshid Dashti, Deputy CEO Omani Grant Hospital Dr Hameed Baloch aur Drug Inspector samet deegar mutaliqa mahakmon ke numaindon aur stakeholders ne shirkat ki.

Ijlas mein sehat ke shobe ko darpesh challenges, hospitalon aur bunyadi marakiz-e-sehat mein dastiyab sahuliyat, tibbi aalat, adwiyat ki faraahmi, insani wasail aur awam ko miyari tibbi khidmat ki faraahmi se mutaliq mukhtalif agenda nukat aur sehat ke nizam ko mazeed muassir banane ki tajaweez zer-e-ghaur aayin.

Hazri yaqeeni banane aur dengue muhim jari rakhne par zor

Ijlas mein bataya gaya ke tamam tibbi marakiz mein doctoron aur amle ki hazri yaqeeni banayi jaye aur ghair hazir afsaran o mulazimin ke khilaf qawaid o zawabit ke mutabiq sakht mahakmana karrawai amal mein layi jaye. Ghair hazir tibbi amle ke khilaf disciplinary action aur tankhwahon mein katauti se mutaliq umoor par bhi ghaur kiya gaya.

Haliya insdad-e-dengue muhim ka jaiza lete hue briefing mein bataya gaya ke zilai intezamiya aur mahakma sehat ki mushtarka kawishon se zila bhar mein dengue virus ke tadaruk ke liye muassir spray muhim chalayi gayi, jis ke musbat nataij samne aaye hain aur maujooda surat-e-haal tasalli bakhsh hai. Insdad-e-dengue sargarmiyon ko tasalsul se jari rakhne aur awami aagahi muhim ko mazeed muassir banane par zor diya gaya.

Ijlas mein kaha gaya ke miyari tibbi khidmat ki faraahmi ko mazeed muassir banaya jaye ga taake zila ke tamam shehriyon ko behtar sehat ki sahuliyat muyassar aa saken.

Drug Inspector ne Additional Deputy Commissioner ko briefing dete hue bataya ke zila bhar ke tamam medical stores license yafta hain. Is mauqe par Deputy Commissioner ne hidayat ki ke medical stores ki jaanch ke liye aik committee tashkeel di jaye, aur jo medical store baghair license paya jaye us ke khilaf karrawai kar ke use fori taur par seal kiya jaye.

Tasveer: Bashukriya DGPR Balochistan