Koh-e-Sulaiman Division ki tamam divisional aasamiyon ki manzoori, Sarfraz Bugti ka elaan

Dera Bugti: Wazir-e-aala Balochistan Mir Sarfraz Bugti ne shumali Dera Bugti mein aham press conference se khitab karte hue Koh-e-Sulaiman Division ki tamam divisional aasamiyon ki manzoori ka elaan kiya.

Unhon ne kaha ke officers aur amle ki taynati jald amal mein layi jayegi taake division ke intizami umoor ko faal banane ke saath awam ko sarkari sahuliyat ki faraahmi yaqeeni banayi ja sake.

Intizami units aur taraqqiyati mansube

Wazir-e-aala ne kaha ke awam ko hukumati idaron tak aasan rasai faraham karne aur intizami umoor ko mazeed moassar banane ke liye chhote intizami units ka qiyam nagzeer hai. Is maqsad ke tehat Rakhni ko Balochistan ka misali division banane ke liye taraqqiyati amal shuru kar diya gaya hai.

Unhon ne kaha ke tamam taraqqiyati projects mein shaffafiyat, miyar aur merit ko har soorat yaqeeni banaya jayega.

Aman o Aman

Sarfraz Bugti ne Gwadar mein dehshatgard hamle ko nakam banane par security forces ki barwaqt karrawai ko saraha. Unhon ne kaha ke Dehshatgardi ke khilaf jang mein Pak Fauj, FC aur police ki qurbaniyan aur jurat mandana iqdamat qabil-e-fakhr hain.

Unhon ne kaha ke mulk dushman anasir ke khilaf security idaron ki karrawaiyan qabil-e-tehseen hain aur Aman o Aman ke qiyam ke liye tamam mutaalliqa idare apni zimmedariyan ada kar rahe hain.

Wazir-e-aala ne mazeed kaha ke August ke baad Balochistan mein Dehshatgardi ke waqiat ke rujhan mein kami ek musbat pesh raft hai, jis se Aman o Aman ki surat-e-haal mein behtari ki umeed paida hui hai. Hukumat soobe mein paidar aman, awam ko bunyadi sahuliyat ki faraahmi aur taraqqiyati amal ko tez karne ke liye apni koshishen jari rakhegi.