Fi al haal kisi naye rishte ke liye tayyar nahin hoon: Salman Khan

Bharat ke reality show ‘Bigg Boss 20’ ka grand premiere guzishta dinon hua jis mein Salman Khan ek baar phir show ki mezbani karte nazar aaye.

Programme ke dauran apni zaati zindagi par guftagu karte hue Salman Khan ne Bigg Boss se mazahiya andaz mein mukhatib ho kar kaha ke Bigg Boss ‘aap bhi single, mein bhi single hoon.’

Is mauqe par Bigg Boss ne kaha ke mein single rehte hue khush hoon, jis par Salman Khan ne barjasta wazeh kiya ke mein bhi fi al haal kisi naye rishte ke liye tayyar nahin hoon.

Salman Khan ki single haisiyat ‘Bigg Boss’ mein aksar guftagu ka mauzu banti rahi hai, is se qabl ‘Bigg Boss 16’ ke set par bhi unhon ne kaha tha ke ghair shadi shuda rehna mukammal tor par mera apna intikhab nahin tha.

Wazeh rahe ke Salman Khan mazi mein bhi kai martaba shadi aur rishte se mutaliq sawalat ka samna kar chuke hain, un ki sabiqa romani zindagi mein Aishwarya Rai Bachchan, Somy Ali, Sangeeta Bijlani aur Katrina Kaif ke naam zer-e-gardish rahe hain, taham un mein se kai taalluqat kabhi bazabta tor par tasleem nahin kiye gaye.

Bollywood Salman Khan ne is mauqe par yeh bhi kaha tha ke mein ahd se khaufzada nahin, balke jab kisi cheez ka ahd karta hoon to use nibhata hoon.

Unhon ne khawateen ke ehtram par bhi zor dete hue kaha tha ke mein khawateen ka ehtram karta hoon aur hamesha karta rahoon ga.