Export Development Fund ke 24 arab rupay karobari baradari ke liye makhsoos

Prime Minister Shehbaz Sharif ne Export Development Fund aur Export Import Bank of Pakistan (EXIM Bank of Pakistan) ki janib se bil-khusoos chhote aur darmiyane darje ke karobari idaron (SMEs) ke liye baramadi insurance coverage faraham karne ka khairmaqdam kiya.

Unhon ne kaha ke 3 arab rupay ka risk pool bil-khusoos chhote aur darmiyane darje ke karobari idaron (SMEs) ke liye export credit insurance tak rasai ko wusat deta hai, is faisle se karobari baradari ko baramadat ka hajm barhane mein sahulat milegi.

Muhammad Shehbaz Sharif ka kehna tha ke mulk mein chhote aur darmiyane darje ke karobari idaron ke farogh ke liye yeh intihai khush aaind iqdam hai, mulki maishat ko taqwiyat dene ke liye islahat par Export Development Fund ki team qabil-e-tehseen hai.

Prime Minister ne kaha ke tanzeem-e-nau aur islahat ke baad EDF ki qiyadat niji shobe ke mahireen ke supurd kar di gayi hai, EDF ke paas mojood tamam sarmaya karobari baradari ki sahulat ke liye barue kaar laya ja raha hai.

Unhon ne kaha ke yeh iqdamat hukumat-e-Pakistan ke mulki maishat ko farogh dene aur baramadat mein izafe ke azm ke akkas hain, in iqdamat ke zariye Pakistan alami satah par sarmaya kari ka markaz bane ga, tamam iqdamat baramadat par mabni maishat ko farogh dene ke azm ki takmeel ke liye kiye ja rahe hain.

Ijlas mein Prime Minister ko EDF ki tanzeem-e-nau aur islahat ke hawale se briefing di gayi. Briefing mein bataya gaya ke EDF ke paas mojood 24 arab rupay mukammal tor par karobari baradari ki sahulat ke liye sarmaya kari ke liye makhsoos kar diye gaye hain, mazid infrastructure ki mad mein kisi qism ka kharcha nahin kiya jaye ga.

Briefing mein bataya gaya ke EDF mein mulki maishat ki taraqqi aur karobari baradari ki sahulat ke liye tehqeeq, skills development aur musabqat mein izafe ke iqdamat kiye ja rahe hain.

Ijlas mein bataya gaya ke Pakistan ki European market tak rasai ke liye khusoosi muraat tijarati nizam (GSP Plus Status) mein tawseeo ke hawale se iqdamat bhi kiye ja rahe hain.

Ijlas mein Deputy Prime Minister o Foreign Minister Muhammad Ishaq Dar, federal wuzara Muhammad Aurangzeb, Rana Tanveer Hussain, Jam Kamal Khan, Ahad Khan Cheema, Minister of State for Finance Bilal Azhar Kayani, Prime Minister ke mushir Haroon Akhtar, EDF board ke chairman Umar Saeed aur mutaalliqa idaron ke aala afsaran shareek the.