Baat pehli biwi banne ki nahin, baat wahid biwi hone ki hai: Mishal Khan

Haal hi mein Mishal Khan ne ek podcast mein shirkat ki, jahan unhon ne shadi se mutaliq apne khadshat aur tarjihat ke bare mein khul kar guftagu ki.

Shadi ke hawale se baat karte hue Mishal Khan ne kaha ke shadi jaisa khaas mauqa abhi meri zindagi mein nahin aaya, taham jab aaye ga to achanak hi hoga.

Un ka kehna tha ke mein apni shadi ko niji rakhna chahti hoon, lekin mujhe yeh fikar hai ke mein kis tarah is baat ko yaqeeni banaungi ke log meri azdawaji zindagi mein mudakhilat na karein, Mishal Khan ne kaha ke masalan mein elan karoon ke meri shadi ho gayi hai, lekin sath hi meri yeh khwahish bhi hogi ke log is bare mein baat na karein, is par blogs na likhein aur ise niji hi rehne dein.

Unhon ne apni azdawaji zindagi se mutaliq ek aur wazeh shart ka zikr karte hue kaha ke mein aise mard ko pasand nahin karoongi jo doosri shadi kare.

Un ke mutabiq mein chahti hoon ke meri zindagi mein mera hone wala shohar hi wahid mard ho aur mein bhi us ki zindagi mein wahid khatoon hoon.

Mishal Khan ne mazeed kaha ke mujhe kisi mard ke maazi se masla nahin, hatta ke agar koi talaq yafta ho to bhi mujhe aitraz nahin, taham jab woh mujh se shadi kare to us waqt ghair shadi shuda hona chahiye.

Adakara ne wazeh kiya ke baat pehli biwi banne ki nahin hai, baat wahid biwi hone ki hai.