Amriki nuqsanat se mutaliq samne aane wali maloomat iceberg ka sirf sira hain: Araghchi

Abbas Araghchi ne Social Media platform X par Amriki hukkam ke is taassur ko mustarad kiya ke Iran bedifa hai, unhon ne Amriki mehkama-e-difa ki report ka hawala dete hue kaha ke sainkron Amriki fauji maqamat ko nuqsan pahuncha ya tabah kiya gaya jabke darjanon tayyare mutassir hue.

Irani wazir-e-kharija ne Amriki nuqsanat se mutaliq samne aane wali maloomat ko “iceberg ka sirf sira” qarar dete hue kaha ke Iran munasib waqt par mazeed tafsilat jari karega.

Amriki mehkama-e-difa ke inspector general ki 14 September ko jari report ke mutabiq 30 June 2026 tak Irani hamlon se Middle East ke mutaddid mumalik mein Amriki fauji adon ki sainkron imaraton aur deegar tansibat ko nuqsan pahuncha ya woh tabah huin. Report mein Amriki tayyaron aur drones ko pahunchne wale nuqsanat aur hathiyaron ke zakhire mein kami ka bhi zikr kiya gaya hai.

Report ke mutabiq jang ke dauran Amriki akhrajat 33.4 arab dollar tak pahunche, jabke Amriki fauj ki janib se taqriban 22 arab dollar maliyat ke hathiyar istemal kiye gaye.

Araghchi ne Amriki daawon ko mustarad karte hue kaha ke Iran ke bare mein yeh taassur durust nahin ke woh bedifa hai, jabke mazeed nuqsanat aur jang se mutaliq maloomat baad mein samne layi jayengi. Un ke baaz izafi daawon ki azadana taur par mukammal tasdeeq nahin ho saki hai.