American senators ka Pentagon se Iran jang ki haqiqi lagat zahir karne ka mutalba, CENTCOM sarbarah ko khat

Washington: America ke Democrat senators ne Pentagon se mutalba kiya hai ke woh Iran ke khilaf jang par aane wale mujmoi akhrajat ki tafseelat zahir kare.

Ghair mulki media reports ke mutabiq senators ka kehna tha ke Trump administration ki janib se is jang ki haqiqi lagat chhupane ki musalsal koshishen ishtial angez aur naqabil-e-qubool hain.

CENTCOM sarbarah ko khat

Senator Elizabeth Warren ki qiyadat mein 5 senators ne American Central Command ke sarbarah Admiral Brad Cooper ko khat likh kar American fauji adon ko pohanchne wale nuqsan ke takhmine, marammat ke liye muqarrara muddat aur mutabadil tansibat par hone wale akhrajat ki tafseelat talab ki hain.

American fauj ke andaze ke mutabiq 3 September tak Iran ke khilaf jang par 43.6 arab dollar kharch ho chuke the, taham is takhmine mein un fauji adon aur tansibat ko pohanchne wale nuqsan ki lagat shamil nahin thi jo Irani hamlon ka nishana bane.

Senators ne khat mein likha ke American awam yeh jaanne ke haqdar hain ke Trump administration ki janib se Iran ke khilaf shuru ki gayi ghair mujaz jang par mujmoi taur par kitni lagat aayi hai.

Unhon ne nishandehi ki ke Admiral Brad Cooper ne ek khufia briefing ke dauran nuqsan se mutaliq takhmina pesh kiya tha, aur is takhmine ko khufia rakhne ka koi jawaz nahin hai.

American senators ka kehna tha ke ittehadi mumalik ke fauji adon aur tansibat ko pohanchne wale nuqsan ne bhi khitte mein America ke sharakatdaron ke liye jang ke akhrajat barha diye hain aur American faujiyon ko khatre se dochar kar diya hai.