Allah ki narazi ka sabab banne wale kaam 8 saal qabl chhor diye the: Adakara Laila

Laila 1990 ki dahai se Showbiz industry se wabasta hain, reality show mein unhon ne apni zati zindagi, khwahishat aur Showbiz career ke mukhtalif pehluon par baat ki.

Guftagu ke dauran Laila ne apne mazi ke baaz aise performances ka bhi zikr kiya jinhein aaj woh munasib nahin samajhtin.

Reality show mein apne mazi ke bold performances ke hawale se guftagu karte hue kaha ke taqriban aath saal qabl unhon ne aise kaam chhorne ka faisla kiya jo un ke mutabiq Allah Taala ki marzi ke khilaf the.

Adakara ne kaha ke woh reality show jeetne ke liye dua kar rahi hain kyunke inami raqam se woh apna ghar aur ek bari gari kharidne ka khwab poora karna chahti hain.

Laila ki guftagu nashar hone ke baad Social Media users ki jaanib se mukhtalif rad-e-amal samne aaya, kuchh logon ne un ke mazi par baat karne ke bajaye mojuda soch aur tabdeeli ko saraha, jabke baaz users ne un ke bayanat par tanqeed bhi ki.

Ek user ne likha ke Laila ki guftagu banawati mehsoos nahin hoti aur dua ki ke Allah un ki duaen qabool kare.

Ek aur user ne un ke liye nek khwahishat ka izhar karte hue kaha ke woh umeed karte hain Laila reality show jeetengi kyunke unhon ne apni khwahish ka izhar khuloos ke sath kiya hai.

Taham baaz afraad ne un ke bar bar apni mushkilat aur mazi ke tajurbat ka zikr karne par bhi tanqeed ki.