Wazir-e-aala Khyber Pakhtunkhwa adalati hukm ke bawajood sarkari helicopter par Lakki Marwat long march pohanche

Lakki Marwat (Atemad Desk): Wazir-e-aala Khyber Pakhtunkhwa Islamabad High Court ke ahkamat ke bawajood sarkari helicopter par PTI ke long march mein shirkat ke liye Lakki Marwat pohanch gaye.

Islamabad High Court ne 18 September ko long march se mutaliq 37 safhat ke tafseeli faisle mein soobai hukumaton aur wuzraye-aala par siyasi march ya ehtijaj mein sarkari wasail ke istemal ki mumani’at ki thi. Faisle ki roo se Islamabad ki jaanib kisi bhi march ke liye sarkari funds, gaadiyan, helicopter, sarkari ahlkar ya machinery istemal nahin ki ja sakti. Court ne pur-amn ehtijaj ko aini haq qarar diya tha, taham asla saath lane ki ijazat nahin di thi.

Idhar intelligence zarai ka daawa hai ke social aur digital media par gardish karne wali tasaweer mein long march ke shurka mein salt rifleon se musallah afrad dikhai de rahe hain.

Zarai ke mutabiq hathiyar ke saath nazar aane wale afrad mein se aik ki shanakht Gul Bahadur group ke kharji Shahidullah urf Ghazi ke taur par hui hai, jo Makeen ka rahaishi hai aur mutaddid dehshatgard hamlon mein shareek raha hai. March ki aad mein chhupe deegar dehshatgardon ki nishandahi ka amal bhi jari hai.