Uthal mein Jashn-e-Azadi Lasbela Sports Festival ke futsal muqable: Uthal Bazigar aur Uthal Eagle final mein

Uthal: Jashn-e-Azadi Lasbela Sports Festival ke silsile mein Jam Muhammad Futsal Stadium Uthal mein futsal muqablon ka aghaz ho gaya hai, jis mein mukhtalif teamein bharpoor josh o jazbe se hissa le rahi hain.

Iftitahi marhale mein Uthal Red ne Uthal United ko 2-1 se aur Uthal Green ne Uthal Markhor ko 3-2 se shikast di. Teesre match mein Uthal Bazigar ne Uthal Badshah ko 1-0 se hara kar semi final ke liye qualify kiya, jabke ek aur muqable mein Uthal Eagle ne Uthal Tiger ko 5-2 se shikast di.

Pehle semi final mein Uthal Bazigar ne Uthal Red ko 3-2 se hara kar final mein jagah banayi. Dusre semi final mein Uthal Eagle ne Uthal Green ko 6-5 se shikast di, jis mein Arif Khosa ke paanch goal numayan rahe. Final mein Uthal Bazigar ka muqabla Uthal Eagle se hoga.

Muqablon se shaiqeen mein bharpoor josh o kharosh paya jata hai aur muqami khilariyon ko salahiyaton ke izhar ka mauqa mil raha hai. Khilariyon ne Chief Minister Balochistan, Mushir Khel, Mahkama Khel aur zilai intizamia ki dilchaspi aur taawun ko saraha. Muqablon ke organizer Captain Nazir Ahmed Shahouk hain, jabke Shafi Bhaijan, Hidayatullah Huda Gwadari, Karim Doda, Sher Dil Jamot, Mustafa Bura aur Shaukat Jamot samet digar moawanat kar rahe hain.

Tasveer: Bashukriya DGPR Balochistan