Uthal: Deputy Commissioner Lasbela Humaira Baloch ne shaheed lady Polio worker ke ahl-e-khana ko maali imdad ka cheque diya

Uthal: Deputy Commissioner Lasbela Humaira Baloch ne traffic hadsay mein shaheed hone wali lady Polio worker ke ahl-e-khana se izhar-e-taziyat kiya aur zilai intizamia Lasbela aur mehkama Sehat ki mushtarka kawishon se maali imdad ka cheque lawahiqeen ke hawale kiya. Unhon ne shaheed Polio worker ke bete ko matric tak muft Taleem ki faraahmi ka bhi elan kiya.

Is mauqe par Deputy Commissioner Humaira Baloch ne kaha ke Polio workers qaumi fareeza anjam dete hue bachon ko mozi marz se mehfooz banane mein aham kirdar ada karte hain aur un ki khidmat qabil-e-qadr hain. Unhon ne kaha ke shaheed lady Polio worker ki qurbani hamesha yaad rakhi jaye gi aur zilai intizamia mutasira khandan ki har mumkin muawanat jari rakhe gi.

Wazeh rahe ke is traffic hadsay mein ek lady Polio worker shaheed jabke ek doosri shadeed zakhmi hui thi.

Deputy Commissioner ne kaha ke hukumat Balochistan aur zilai intizamia awami khidmat aur faraiz ki anjam dehi ke dauran mutasir hone wale ahlkaron aur un ke khandanon ki falah o behbood ke liye sanjeeda iqdamat kar rahi hai.

Is mauqe par World Health Organization (WHO) zila Lasbela ke numainda Dr Muneer Baloch, General Councillor Municipal Committee Uthal Naseer Ahmed Langah aur District Emergency Operation Centre (DEOC) Lasbela ki Dr Nida Rasheed bhi mojood thin.

Tasveer: Bashukriya DGPR Balochistan