Uthal: Commissioner Lasbela Division Saira Atta ki sadarat mein Communication and Works Department ke mansubon par ijlas

Uthal: Commissioner Lasbela Division Saira Atta ki zer-e-sadarat zila Lasbela mein Communication and Works Department (C&W) ke tehat jari aur mujawwaza taraqqiyati mansubon par pesh raft ke hawale se ijlas munaqid hua.

Ijlas mein Deputy Commissioner Humaira Baloch, SP Lasbela Najeebullah Pandrani aur XEN Road shareek hue. Communication and Works Department ke engineer ne zila bhar mein sarkon ki tameer o marammat aur deegar taraqqiyati schemon se mutaliq Commissioner Lasbela ko tafseeli briefing di.

Briefing ke dauran taraqqiyati mansubon ki maujooda surat-e-haal, pesh raft, takmeel ki muddat aur darpesh masail ke bare mein Commissioner ko agah kiya gaya.

Commissioner ki hidayat

Commissioner Lasbela Division ne hidayat ki ke tamam taraqqiyati mansubon par kaam muqarrara miyar aur miyad ke mutabiq mukammal kiya jaye. Unhon ne mansubon ki mouassir nigrani, tameeraati kaamon ke miyar ko yaqeeni banane aur schemon mein shaffafiyat barqarar rakhne par zor diya.

Unhon ne sarkari afsaran ko hidayat ki ke mansubon mein hail rukawatein fori door ki jayen aur tamam schemon par pesh raft ki baqaidagi se nigrani karte hue report pesh ki jaye, taake awam ko behtar safri sahuliyat aur miyari bunyadi dhancha faraham kiya ja sake.

Tasveer: Bashukriya DGPR Balochistan