Usta Muhammad: Tehsildar Gamman Khan Bohar ka petrol pumps ka daura, sarkari nirkhon par amalderamad ki hidayat

Usta Muhammad: Deputy Commissioner Usta Muhammad Muhammad Ramzan Palal ki hidayat par Tehsildar Usta Muhammad Gamman Khan Bohar ne shehr ke mukhtalif ilaqon mein qaim petrol pumps ka daura kiya aur petroleum masnooat ki farokht ke muqarrara nirkhon par amalderamad aur awam ko faraham ki jane wali sahuliyat ka jaiza liya.

Tehsildar ne jin petrol pumps ka muayena kiya un mein Ghanta Ghar Chowk par waqe Mir Umar Khan Pump, Al Akbar Bangulzai Pump, Tahir Petroleum, New Bismillah Filling Station, Al Karim Filling Station, Chandia Petroleum nazd Grid Station, Ghulam Ali Jamali Shahid Filling Station, Moin Petroleum, Kashif Petroleum aur Ali Petroleum shamil hain.

Petrol pump malikan aur amle ko wazeh hidayat jari ki gayin ke hukumat ke muqarrar kardah nirkhon ke mutabiq petroleum masnooat ki farokht yaqeeni banai jaye aur kisi bhi soorat sarfeen se muqarrara qeemat se zaid raqam wasool na ki jaye. Unhein sarkari nirkh name numayan maqamat par aweezan rakhne ki bhi takeed ki gayi taake shehriyon ko qeematon se mutalliq durust malumat mil saken.

Tehsildar Gamman Khan Bohar ne wazeh kiya ke sarkari nirkhon ki khilaf warzi, muqarrara qeemat se zaid wasooli ya awami shikayat ki soorat mein mutalliqa petrol pump malikan ke khilaf qanoon ke mutabiq karrwai ki jaye gi.

Zilai intizamia Usta Muhammad ke mutabiq awam ko relief dene, najaiz munafa khori rokne aur sarkari nirkhon par amalderamad yaqeeni banane ke liye bazaron aur petrol pumps ki nigrani jari hai aur checking ka amal baqaidagi se jari rakha jaye ga.

Tasveer: Bashukriya DGPR Balochistan