Usta Muhammad: Constable bharti ke liye qad aur chhati ki pemaish mukammal, DIG Abdul Hameed Sanjrani ki nigrani

Usta Muhammad: Balochistan Police ne zila Usta Muhammad mein constable ki bharti ke silsile mein umeedwaron ke qad aur chhati ki pemaish ka marhala mukammal kar liya. Yeh amal DIG police crimes branch Balochistan o chairman recruitment committee zila Usta Muhammad Abdul Hameed Sanjrani ki nigrani mein mukammal hua.

Jismani pemaish ka marhala muqarrara miyar aur qawaid o zawabit ke mutabiq anjam diya gaya, jis ka maqsad bharti ke amal mein shaffafiyat barqarar rakhna aur ahl umeedwaron ka intikhab yaqeeni banana hai.

DIG ne kaha ke bharti ke tamam marahil mein merit, shaffafiyat aur qawaid o zawabit ki pasdari ko bunyadi ahmiyat di ja rahi hai. Umeedwaron ki jaanch partaal muqarrara tareeqa-e-kar ke tahat ki ja rahi hai taake amal munsifana rahe aur kisi umeedwar ke sath imtiyazi sulook na ho.

Is moqe par committee ke arkan AIG Welfare Tahir Mustafa, SP Usta Muhammad Hafiz Moaz-ur-Rehman, Pak Army ke afsaran aur FC colonel bhi mojood the.

Pemaish ka marhala mukammal hone ke baad bharti ke aainda marahil bhi muqarrara qawaid o zawabit ke tahat mukammal kiye jayenge. DIG ne kaha ke shaffafiyat aur merit ko yaqeeni banana awwaleen tarjeeh hai taake jismani aur deegar muqarrara miyar par poora utarne wale ahl umeedwar police force mein khidmat anjam de saken.