Usta Muhammad: Chief Engineer Bashir Nasir ka DC Complex aur DPO Office samet taraqiyati mansoobon ka muaina

Usta Muhammad: Chief Minister Balochistan Mir Sarfraz Bugti aur Chief Secretary Balochistan Shakeel Qadir Khan ke vision aur soobai wazir Communication and Works Department Mir Saleem Khan Khosa aur soobai secretary C&W Babar Khan ki hidayat par Naseerabad Zone mein mufad-e-aamma ki schemon ki kari nigrani ka silsila jari hai.

Isi silsile mein Chief Engineer Communication and Works Department Naseerabad Zone Bashir Nasir ne zila Usta Muhammad mein jari taraqiyati mansoobon ka mauqe par pahunch kar tafseeli muaina kiya, mukhtalif schemon ki pesh raft ka jaiza liya aur mutaliqa afsaran se taameeraati umoor par briefing hasil ki. Unhon ne DC Complex, DPO Office o rihaish gah, Prefab aur Agro project samet deegar mansoobon ka muaina kiya.

Is mauqe par unhon ne mansoobon ke taameeraati miyar, kaam ki raftar aur dastiyab sahuliyat ka jaiza lete hue mutaliqa engineers aur afsaran ko zaroori hidayat jari keen aur miyar ke mutabiq mansooby mukammal karne ki sakht hidayat di.

Chief Engineer Bashir Nasir ne kaha ke sarkari taraqiyati mansoobe awami sahuliyat mein behtari ka ahem zariya hain, is liye tamam mansoobon mein miyar, paidari aur muqarrara muddat mein takmeel har surat yaqeeni banai jaye. Engineers apni nigrani mein jari schemon par musalsal nazar rakhein aur taameeraati kaam mein kisi kotahi ya ghaflat ka muzahira na kiya jaye. Mansoobon ki barwaqt takmeel se awam ko behtar sahuliyat milengi aur Communication and Works Department ki karkardagi bhi mazeed behtar hogi.

Tasveer: Bashukriya DGPR Balochistan