University of Turbat mein Yaum-e-Istehsal-e-Kashmir ki taqreeb, Vice Chancellor Dr Gul Hasan ki sadarat

Turbat: Maqbooza Jammu o Kashmir ki khusoosi aini haisiyat ki ghair qanooni mansookhi ke khilaf aur Kashmiri awam ki jidd-o-jehd-e-azadi se izhar-e-yakjehti ke liye mulk ki deegar jamiaat ki tarah University of Turbat mein bhi 5 August 2026 ko Yaum-e-Istehsal-e-Kashmir bharpoor andaz mein manaya gaya.

Vice Chancellor Professor Dr Gul Hasan ki sadarat mein mun’aqida taqreeb mein tadreesi o intizami shobon ke sarbarahan, faculty members aur intizami amle ne badi tadad mein shirkat ki. Taqreeb ka aghaz tilawat-e-Kalam Pak aur qaumi tarane se hua. Registrar Kangozar Baloch aur Faculty of Law ke Assistant Professor Dr Naseem Baloch samet deegar ne bhi khitab kiya.

Muqarrireen ne kaha ke 5 August 2019 ko Bharat ne maqbooza Kashmir ki khusoosi aini haisiyat khatam kar di jo Aqwam-e-Muttahida ki Security Council ki qarardadon ki khulam khula aur sangeen khilaf warzi thi, aur is yaktarfa o ghair qanooni iqdam ko Kashmiriyon, Pakistaniyon aur aalmi biradari ne mukammal tor par mustarad kar diya tha. Un ka kehna tha ke is ke baad se Bharati forces ne maqbooza wadi ke awam par zulm o barbariyat ka silsila mazeed tez kar diya hai, aur isi iqdam ke khilaf hukumat Pakistan ne 2020 se 5 August ko Yaum-e-Istehsal ke tor par manane ka faisla kiya.

Muqarrireen ne kaha ke Kashmiriyon ke buniyadi insani huqooq aur tareekhi shanakht ko ghasb karna hi poore khitte mein adam istehkam ki buniyadi wajah hai. University of Turbat is moqif ki mukammal himayat karti hai ke Pakistan Security Council ki qarardadon ke mutabiq Kashmiri awam ki haq-e-khud iradiyat ki jidd-o-jehd ki akhlaqi, safarti aur siyasi himayat kar raha hai, aur isi mazboot moqif ki badaulat America samet muta’addid aalmi taqatein masla Kashmir ke hal ke liye salisi ki pesh kash kar chuki hain.

Tasveer: bashukriya DGPR Balochistan