University of Turbat mein MPhil Political Science ki Graduate Research Committee ka pehla ijlas, supervisors ki sifarish

Turbat: University of Turbat ke shobae Political Science ki faculty Graduate Research Committee (FGRC) ka pehla ijlas 5 September ko university ke video conference room mein Faculty of Social Sciences ke dean Dr Tahir Hakeem ki zer-e-sadarat munaqid hua jis mein MPhil Political Science program se mutaliq umoor par ghaur kiya gaya.

Ijlas mein aala Taleem mein tehqeeq ki ahmiyat aur miyari tehqeeq ke tareeqa-e-kaar par guftagu hui, aur session 2026-2027 ke MPhil scholars ke liye tehqeeqi supervisors ki taqarruri o tauseeq ki sifarish ki gayi jo hatmi manzoori ke liye Advanced Studies and Research Board ko pesh ki jaye gi.

Ijlas mein Faculty of Law ke dean Dr Muzaffar Hussain, director Graduate Studies Dr Waseem Barkat, chairman shobae Political Science Changez Ahmed aur Assistant Professor Dr Muhammad Salim ne bhi shirkat ki. Vice Chancellor Professor Dr Gul Hassan ne tehqeeqi culture ke farogh ke liye faculty ki kawishon ko saraha aur tamam shobon mein muashrati tor par bamaini tehqeeq ke farogh par zor diya.

Tasveer: bashukriya DGPR Balochistan