Turbat: Assistant Commissioner Dasht Nadeem Iqbal Bangulzai ka sarkari mahkamon ka daura, ghair hazir amle ke khilaf karrawai ki hidayat

Turbat: Deputy Commissioner Kech ki hidayat ki roshni mein Assistant Commissioner Dasht Nadeem Iqbal Bangulzai ne sub division Dasht ke mukhtalif sarkari mahkamon ka daura kiya.

Daura kiye gaye idaron mein Rural Health Centre (RHC) Kadan, Bunyadi Markaz-e-Sehat (BHU) Kinchiti, police station Kadan, NADRA office, Benazir Income Support Programme (BISP) office, public library aur Kadan Park shamil the.

Daure ke dauran Assistant Commissioner ne mutaliqa mahkamon ki karkardagi, hazri, record aur awam ko faraham ki jane wali sahuliyat ka tafseeli jaiza liya aur ghair hazir amle ka notice lete hue mutaliqa hukkam ko zaroori karrawai ki hidayat ki.

Assistant Commissioner Dasht ne tamam afsaran aur amle ko hidayat ki ke woh awam ko barwaqt, shaffaf aur behtareen khidmat ki farahmi yaqeeni banayen aur apne faraiz poori zimmedari, diyanatdari aur peshawarana andaz mein anjam dein.

Tasveer: Bashukriya DGPR Balochistan