Tasp Panjgur ke Girls Inter College mein Golden Week aur Sports Week ke inamaat taqseem

Panjgur: Government Girls Inter College Tasp mein Golden Week aur Sports Week ki rangarang sargarmiyon ke kamyab ikhtitam par inamaat taqseem karne ki pur-waqar taqreeb munaqid hui. Taqreeb mein talibat, asatza, walidain aur ilaqai muazzizeen ne badi tadad mein shirkat ki.

Taqreeb ke mehman-e-khusoosi rukn-e-National Assembly Phulain Baloch the, jabke chairman municipal committee Tasp Abdul Rehman azazi mehman ke taur par shareek hue. Taqreeb ka aghaz tilawat-e-Quran-e-Pak aur hamd o naat se hua.

Talibat ne motivational taqareer, khelon ke muzahire aur mukhtalif hum-nisabi sargarmiyon ke zariye apni salahiyaton ka shandar izhar kiya aur hazireen ne un ki karkardagi ko bharpoor saraha.

Taleemi, ghair nisabi aur khelon mein numaya karkardagi dikhane wali talibat ko shields, tareefi asnaad aur khusoosi inamaat diye gaye.

Rukn National Assembly Phulain Baloch ne khitab mein Golden Week ki sargarmiyon ko talibat ki shakhsiyat sazi ke liye intehai aham qarar diya. Unhon ne college intizamia ki mehnat aur talibat ki karkardagi ko saraha aur kaha ke college mehdood wasail ke bawajood miyari Taleem faraham kar raha hai aur talibat ka josh o jazba khush aind hai.

Un ka kehna tha ke woh college ke bunyadi masail ko tarjihi bunyadon par hal karne ke liye mutaliqa idaron se fori rabta karenge. Unhon ne har mumkin taawun ki yaqeen dehani bhi karayi.

College principal Professor Mushtaq Gichki ne apne khitab mein idare ki majmui karkardagi, Taleemi hikmat-e-amli aur darpesh masail par tafseel se roshni dali. Unhon ne kaha ke kam wasail ke bawajood college ki team behtar mustaqbil ki tashkeel ke liye musalsal koshan hai.

Taqreeb ke aakhir mein talibat ne milli naghme aur group performance pesh ki, jis par shurka ne zabardast taliyan bajayin. Ikhtitam par mehmanan-e-girami ko yadgari shields bhi pesh ki gayin.