Surab mein milawati doodh ke khilaf karrawai, dairy farmers, hotels aur dukandaron par jurmane

Surab: Deputy Commissioner Surab Sahibzada Najeebullah ki hidayat par tehsildar Surab Mahmood Ahmed Kurd ne veterinary officer Dr Muhammad Ayub Zehri, PSAC Muhammad Fazal Lehri aur deegar ahalkaron ke hamrah mukhtalif dairy farms, hotels aur Surab bazar mein doodh farooshon ke khilaf khusoosi karrawai ki.

Karrawai ke dauran doodh ke miyar, pani ki miqdar aur milawat ki janch ki gayi aur khilaf warzi ke murtakib mutaddid dairy farmers, hotels aur dukandaron par jurmane aid kiye gaye. Intezamia ne wazeh kiya ke shehriyon ko naqis aur milawati doodh farokht karne ki kisi soorat ijazat nahin di jayegi.

Deputy Commissioner Sahibzada Najeebullah ne sakht tanbeeh karte hue kaha ke milawat aur ghair miyari doodh ki farokht mein mulawwis anasir ke khilaf bila imtiyaz karrawai jari rahegi aur aainda khilaf warzi par mazeed sakht qanooni karrawai ki jayegi.

Tasveer: Bashukriya DGPR Balochistan