Surab: Jamia Masjid Al-Falah Tablighi Markaz mein namaz-e-Jumma ke baad Grand Khuli Kachehri, Deputy Commissioner ne awami masail sune

Surab: Balochistan ki tareekh mein pehli mortaba Chief Minister Balochistan Mir Sarfraz Ahmed Bugti ke vision aur hidayat ki roshni mein Deputy Commissioner Surab Sahibzada Najeebullah ki zere sadarat Jamia Masjid Al-Falah Tablighi Markaz mein Grand Khuli Kachehri munaqid ki gayi.

FC Balochistan 61 Wing ke commander Colonel Syed Fakhar Rafiq Talha, SP Surab Khursheed Ahmed Baloch, Assistant Commissioner Gidar Abdul Jabbar Bugti, zila afsaran, ulema, siyasi o samaji shakhsiyat, sahafiyon, talba aur awam ne ijtemai tor par namaz-e-Jumma ki adaigi ke baad Khuli Kachehri mein shirkat ki.

Shehriyon ne aman o aman, taleem, sehat, saaf pani, bijli, sports, street lights aur madaris ke liye shamsi tawanai samet mukhtalif masail pesh kiye, jin par Deputy Commissioner ne mutaliqa afsaran ko fori iqdamat ki hidayat jaari keen.

Deputy Commissioner ne kaha ke BSDI ke tehat zila Surab mein awami falah o behbood, bunyadi sahuliyat ki faraahmi aur taraqqiyati kamon ko mazeed moasir andaz mein aage barhaya jayega aur awami zarurat ke mutabiq mukhtalif ilaqon mein taraqqiyati o falahi mansube shuru kiye jayenge. Unhon ne afsaran ko awami masail par sanjeedgi se amal-daramad aur barwaqt pesh raft yaqeeni banane ki hidayat ki.

Khuli Kachehri ke ikhtitam par mulk o qaum, Balochistan mein aman o istehkam aur zila Surab ki taraqqi o khushhali ke liye khusoosi dua bhi karai gayi.

Tasveer: bashukriya DGPR Balochistan