Surab: Fertilizer Tracking Committee ka ijlas, khaad dealers ki baqaida monitoring aur pandrah roza report ka faisla

Surab: Hukumat Balochistan aur Deputy Commissioner Surab Sahibzada Najeebullah ki khusoosi hidayat par Assistant Commissioner Muhammad Taha ki zer-e-sadarat Fertilizer Tracking and Traceability Committee ka ijlas hua, jis mein zila bhar mein khaad ki dastiyabi, stock, tarseel aur muqarrara nirkhon par farokht ka jaiza liya gaya.

Ijlas mein Tehsildar Mehmood Ahmed Kurd aur Naib Tehsildar Ayub Hasan Muhammad Hasni samet deegar hukkam ne shirkat ki. Khaad dealers ke stock o record ki jaanch, tracking nizam par amalderamad aur zakhira andozi o zaid qeemat wasooli ki rok tham par ghaur kiya gaya.

Faisla kiya gaya ke khaad dealers ki baqaidagi se monitoring ki jaye gi aur be-zabtagi ki soorat mein karrawai ke liye report pesh ki jaye gi, jabke khaad ki monitoring se mutaliq pandrah roza report bhi murattab ki jaye gi.

Tasveer: Bashukriya DG PR Balochistan