Sohbatpur: Deputy Commissioner Farida Tareen ka bazar ka daura, Tajawuzat ke khatme aur khubsurati ki hidayat

Sohbatpur: Deputy Commissioner Sohbatpur Farida Tareen ne revenue officers ke hamrah Sohbatpur bazar ka tafseeli daura kiya aur safai suthrai, traffic ki rawani, najaiz Tajawuzat aur awami amad-o-raft ki surat-e-haal ka jaiza liya. Is mauqe par traders union ke numainde bhi maujood the.

Deputy Commissioner ne revenue officers ko hidayat ki ke najaiz Tajawuzat ke khatme ke liye qanoon ke mutabiq moassir iqdamat kiye jayen taake shehriyon ko amad-o-raft mein mushkilat na hon aur bazar mein nazm-o-zabt qaim ho. Unhon ne Balochistan Special Development Initiative (BSDI) ke tehat bazar ki khubsurati, tazeen-o-araish aur bunyadi sahuliyat ki behtari ki tajaweez ka bhi jaiza liya, jin mein dakhli-o-kharji raste, dukanon ke samne ke hisse, safai aur paidal chalne walon ki sahuliyat shamil thin.

Farida Tareen ne kaha ke Sohbatpur bazar shehar ka aham tijarati markaz hai, is liye is ki khubsurati aur behtar intezam shehriyon aur tajiron donon ke liye aham hai, aur taraqqiyati iqdamat mein tajiron aur shehriyon ki tajaweez ko madde nazar rakha jayega.

Deputy Commissioner ne tajiron ke numainDon se mulaqat bhi ki, jinhon ne bazar ki behtari ke liye intezamia se bharpoor taawun ki yaqeen dehani karai. Unhon ne officers ko tajaweez ko amli shakl dene ke liye jamey sifarishat murattab karke mutaliqa hukkam ko pesh karne ki hidayat ki.

Tasveer: Bashukriya DGPR Balochistan