Sindh hukumat ka fake news ki rok tham ke liye NCCIA se madad lene ka faisla

Fake news ki monitoring aur mouassir media hikmat-e-amli banane ki hidayat kar di gayi.

Sindh ke senior minister Sharjeel Inam Memon ki zair-e-sadarat mehkama itlaat ka aham ijlas hua jis mein secretary itlaat Kashif Gulzar Sheikh, DG itlaat Moaz Pirzada aur tamam directors shareek hue.

Sharjeel Inam Memon ne wazeh kiya ke jhooti aur gumrah kun itlaat ke zariye kisi bhi shakhs ya idare ko nuqsan pahunchane ki koshish bardasht nahin ki jayegi.

Senior minister ne hukm diya ke fake news aur gumrah kun itlaat ki rok tham ke liye National Cyber Crime Investigation Agency se moavanat li jaye, mainstream aur Social Media par jadeed Technology ki madad se fake news ki rozana ki bunyad par monitoring ki jayegi.

Sharjeel Inam Memon ne kaha ke fake news ki nishandehi, tasdeeq aur barwaqt tadaruk ke liye mehkama itlaat mein mouassir monitoring ka nizam waza kiya jayega, fake news ke tadaruk ke liye mehkama itlaat aur NCCIA ke darmiyan taawun mazeed barhaya jayega.

Unhon ne kaha ke fake news banane aur phailane walon ke khilaf qanooni karrawai ke liye NCCIA se moavanat hasil ki jayegi, Sindh hukumat ka bayania aman, rawadari, bain-ul-soobai hum ahangi aur qaumi ittehad par mabni hai.

Sharjeel Inam Memon ne kaha ke Sindh hukumat ke bayanie ko mazeed mouassir aur mazboot banane ke liye izafi iqdamat kiye jayen, mehkama itlaat Sindh hukumat ke musbat aur tameeri bayanie ko mazeed ujagar karne ke liye jadeed zaraye iblagh se istifada kare.

Senior minister ka kehna tha ke tamam tabqat ke numainadon ko Sindh hukumat ke bayanie ka hissa banaya jaye, mehkama itlaat fake news ki monitoring ke sath Sindh hukumat ke musbat bayanie ki mouassir tarweej par bhi tawajjo de