Sibi: Monsoon Shajarkari muhim ke tahat District Jail mein pauday lagaye gaye, jangalat aur jail hukkam ki shirkat

Sibi: Nazim-e-aala jangalat Sibi Zahid Khan Rind ki khusoosi hidayat par zila bhar mein jari Monsoon Shajarkari muhim ke silsile mein District Jail Sibi mein bhi shajarkari ki gayi, jis mein mehkama jangalat o jangli hayat aur mehkama jail khanajat ke afsaran o ahlkaron ne bharpoor shirkat ki.

Is mauqe par Superintendent Jail Sibi Hammad Awan, Divisional Forest Officer Sibi Tariq Shah, Assistant Conservator Wildlife Muhammad Rafiq Khajak, Deputy Superintendent Jail Tahir Khan Domki aur Assistant Jail Taimur Shah ne deegar amle ke hamrah jail ke ahate mein mukhtalif aqsam ke pauday lagaye.

Mehkama jangalat o jangli hayat ke hukkam ne kaha ke Monsoon ka Mausam Shajarkari ke liye intihai mauzoon hota hai aur mahaulyati tawazun barqarar rakhne aur Sibi ko sarsabz o shadab banane ke liye yeh muhim intihai aham hai. Unhon ne kaha ke shehriyon mein bhi shaoor ujagar kiya ja raha hai taake zyada se zyada darakht laga kar aane wali naslon ke liye Sehat mand mahaul yaqeeni banaya ja sake.

Tasveer: Bashukriya DGPR Balochistan