Sherani: Deputy Commissioner Kalimullah Kakar ka line departments ka jaiza, mansoobon mein takheer bardasht na karne ka elan

Sherani: Deputy Commissioner Sherani Kalimullah Kakar ki zer-e-sadarat zila ke tamam line departments ki karkardagi aur jari taraqqiyati o intizami umoor ka jaiza lene ke liye aham ijlas munaqid hua, jis mein mahkamon ke sarbarahan, zilai afsaran aur mutaliqa hukkam ne shirkat ki. Afsaran ne apne mahkamon ki karkardagi, jari mansoobon, taraqqiyati sargarmiyon, awami khidmaat aur darpesh masail se mutaliq progress reports pesh kin.

Deputy Commissioner ne reports ka jaiza lete hue hidayat ki ke sarkari umoor mein shaffafiyat, merit aur awami mufad ko awwaleen tarjeeh di jaye. Unhon ne kaha ke zilai intizamia ka bunyadi maqsad awam ko behtar sarkari sahuliyat ki faraahmi aur taraqqiyati amal ko tez karna hai, is liye tamam mahkame bahami rabte aur moassir hikmat-e-amli ke tehat kaam karen.

Unhon ne hidayat ki ke tamam taraqqiyati mansoobe muqarrara muddat mein mukammal kiye jayen, taameerati miyar par koi samjhauta na ho aur mansoobon ki baqaida nigrani ki jaye taake sarkari wasail ka moassir istemal yaqeeni ho. Ijlas mein awami masail ke fori izale, daftaron mein nazm o zabt, hazri, shikayat ke barwaqt hal aur mahkamana rabta kari par bhi zor diya gaya.

Kalimullah Kakar ne kaha ke afsaran awam ke khadim ki haisiyat se fraiz anjam den aur logon ko sarkari daftaron mein ghair zaroori mushkilat ka samna na karna pare. Unhon ne wazeh kiya ke taraqqiyati mansoobon mein takheer, sarkari umoor mein ghaflat aur awami masail ke hal mein sustii kisi surat bardasht nahin ki jayegi, aur zilai intizamia Sherani awami falah aur zila ki mujmooi taraqqi ke liye tamam wasail barue kaar lane ke liye purazm hai.

Tasveer: Bashukriya DGPR Balochistan