Sevi Division ke colleges mein khali asamiyan aham masla, commissioner Irfanullah Khan ko briefing

Sevi: Commissioner Sevi Division Irfanullah Khan ko divisional monitoring officer Khalid Hussain ne division ke boys, girls aur inter colleges ki mujmui karkardagi, taleemi surat-e-haal aur darpesh masail ke hawale se tafseeli briefing di.

Briefing ke dauran colleges mein tadrisi amle ki khali asamiyon ko aik aham masle ke taur par ujagar kiya gaya. Divisional monitoring officer ne bataya ke mukhtalif colleges mein asatiza aur deegar mutalliqa amle ki mutaddid asamiyan khali hone ke baais taleemi sargarmiyan mutasir ho rahi hain, jis se talba o talibat ke dakhlon (Enrolment) mein masail paida ho rahe hain.

Amle ki kami ke baais colleges mein BS (BS) degree programs ke ijra aur tasalsul mein bhi mushkilat darpesh hain.

Commissioner Irfanullah Khan ne khali asamiyon aur deegar taleemi masail ki nishandahi ko aham qarar dete hue mutalliqa hukkam se zaroori rabton aur moassir iqdamat ki zaroorat par zor diya, taake tadrisi amal behtar ho, talba o talibat ko aala taleem ke mawaqe mayassar aayen aur colleges mein taleemi miyar mazeed behtar banaya ja sake.

Tasveer: Bashukriya DG PR Balochistan