Sevi: Deputy Commissioner Major (r) Ilyas Kabzai ne bachon ko Polio ke qatre pilaye, locked houses ka khud muaina

Sevi: Deputy Commissioner Sevi Major (r) Ilyas Kabzai ne jari insidad-e-Polio muhim ke dusre roz Sevi ke mukhtalif ilaqon ka daura kiya aur field mein maujood Polio teamon ki karkardagi ka muaina kiya. Unhon ne mukhtalif maqamat par qatre pilane ke amal ka jaiza liya aur mutaddid bachon ko apne hathon se Polio ke qatre bhi pilaye.

Is mauqe par unhon ne Polio teamon ki tally sheets, vaccine ke vials aur deegar record check kiya aur muhim ki pesh raft aur coverage ke bare mein malumat hasil kin.

Polio teamon ki janib se locked houses ki nishandehi par Deputy Commissioner ne khud un gharon ka daura kiya. Muaine mein maloom hua ke baaz gharon mein khandan maujood nahin the aur garmiyon ke baais sard ilaqon ki janib muntaqil hue the aur tahal wapas nahin aaye.

Deputy Commissioner ne teamon ko hidayat ki ke koi bacha Polio ke qatron se mehroom na rahe, record mukammal rakha jaye aur ahdaf ke husool ke liye tamam wasail barue kar laye jayen. Unhon ne kaha ke Polio ka khatma mushtarka qaumi zimmedari hai, is liye walidain, civil society aur mutalliqa idare Polio teamon se bharpoor taawun karen.

Tasveer: Bashukriya DGPR Balochistan