Sarbandan mein water tank ki muntaqli aur mahigiron ke shed ka NOC: Waseem Samad ki GDA ke chief engineer se mulaqat

Gwadar: Rukn Soobai Assembly Gwadar Maulana Hidayat-ur-Rehman Baloch ke moavin Waseem Samad ne chairman union council Sarbandan Naseeb Noshirwani ke hamrah Gwadar Development Authority ke chief engineer Haji Syed Muhammad se mulaqat ki aur Sarbandan mein jari tarqiyati umoor aur awami sahuliyat se mutaliq muamlat par guftagu ki.

Mulaqat mein Sarbandan mein zer-e-tameer water tank ke maqam ka muamla zer-e-bahas aaya. Wafd ne bataya ke maujooda maqam tameer ke liye mauzoon na hone se project mein mushkilat pesh aa rahi hain aur darkhast ki ke tank ko kisi munasib jagah muntaqil kiya jaye taake project mukammal ho kar maqami abadi ko pani ki sahulat faraham kar sake.

Sarbandan jetty par mahigiron ke liye zer-e-tameer shed ke NOC ke muamle par bhi baat hui aur wafd ne rukawat door karne ke liye NOC ke ijra ki darkhast ki. Chief engineer ne dono muamlat ka jaiza lene aur water tank ke liye munasib maqam ke taayyun samet shed ke NOC par zaroori iqdamat ki yaqeen dihani karayi.

Tasveer: Bashukriya DGPR Balochistan