Rukni mein koonj aur bater ke ghair qanooni shikar ke khilaf police aur mahkama jangalat ki karrawai, darjanon jaal talaf

Rukni: Deputy Commissioner Barkhan Saeed-ur-Rehman Kakar ki hidayat par Rukni mein koonj, bater aur deegar jangli parindon ke ghair qanooni shikar ke khilaf police aur mahkama jangalat ne mushtarika karrawai ki.

SDPO Rukni Abdul Jabbar Mengal ki qiyadat mein police team ne DFO Zubair Ahmed aur mahkama jangalat ke amle ke hamrah mukhtalif ilaqon mein ghair qanooni shikar ke liye nasb darjanon jaal ukhaar diye, jabke shikar mein istemal hone wale jaal aur deegar aalat qabze mein le kar talaf kar diye gaye.

Abdul Jabbar Mengal ne kaha ke jangli hayat ka ghair qanooni shikar kisi soorat bardasht nahin kiya jayega aur koonj, bater samet deegar parindon ke tahaffuz ke liye karrawaiyan mazeed muassar banai jayengi. Unhon ne kaha ke jangli hayat aur qudrati mahaul ka tahaffuz sab ki mushtarika zimmedari hai aur khilaf warzi karne walon ke khilaf bila imtiaz karrawai hogi.

Shehriyon aur mahaul dost halqon ne mushtarika karrawai ko saraha hai.

Tasveer: Bashukriya DG PR Balochistan