Rukni mein gosht market par chhapa, qasai ki fridge se 8 kilo muzir-e-sehat gosht baramad kar ke talaf

Rukni: Deputy Commissioner Barkhan Saeedur Rehman Kakar ki khusoosi hidayat par Assistant Commissioner Rukni Fahad Hussain Umrani ne veterinary doctor Saeed Ahmed ke hamrah gosht market ka daura kiya. Karrawai ke dauran ek qasai ki fridge se 8 kilo muzir-e-sehat gosht baramad hua, jise mauqe par hi talaf kar diya gaya aur dukandar par jurmana bhi aid kiya gaya.

Assistant Commissioner ne dukandar ko sakht tambih karte hue kaha ke awam ki sehat se khelne aur muzir-e-sehat gosht farokht karne ki kisi soorat ijazat nahin di jaye gi, aur aainda khilaf warzi par zimmedaron ke khilaf qanoon ke mutabiq sakht karrawai hogi.

Unhon ne kaha ke awam ko miyari aur sehat bakhsh gosht ki faraahmi yaqeeni banane ke liye checking ka silsila jari rahe ga. Intizamia ne wazeh kiya ke muzir-e-sehat ya ghair miyari gosht farokht karne walon se koi riayat nahin barti jaye gi.

Tasveer: Bashukriya DGPR Balochistan