Rakhni mein model bazar, traffic management aur main bazar sarak ki kushadgi par commissioner Koh-e-Sulaiman ka ijlas

Barkhan/Rakhni: Chief Minister Balochistan Mir Sarfraz Bugti ki hidayat par commissioner Koh-e-Sulaiman Division Mujeeb ur Rehman Qambrani ki zer-e-sadarat model bazar aur main bazar ke mansoobon ke hawale se aham ijlas munaqid hua, jis mein tameeraati kaam ki pesh raft, traffic ki rawani aur shehriyon ke masail ka jaiza liya gaya.

Ijlas mein project director Barkhan ta Rakhni road Muhammad Zafar Khosa, SE C&W Muhammad Razzaq, XEN B&R Fazal Muhammad Zarkoon, engineer Abdul Rehman Khetran aur assistant commissioner Rakhni Fahad Hussain Umrani sameet deegar afsaran ne shirkat ki.

Ijlas mein model bazar ke tameeraati kaam ko muqarrara taqazon ke mutabiq aage barhane, shehr mein traffic management, court wale road ki clearance, bypass se main road tak rasta kholne aur main bazar mein sarak ki kushadgi par ghaur kiya gaya, jabke mutaalliqa SE ne traffic, sarkon par rukawaton aur Tajawuzat ke masail se aagah kiya.

Commissioner ne hidayat ki ke traffic ki rawani behtar banane aur amad-o-raft aasan banane ke liye amali iqdamat kiye jayen aur mazkoora kaam tarjihi buniyadon par aage barhaye jayen. Unhon ne kaha ke model bazar aur main bazar ki behtar mansooba bandi se shehriyon ko sahulat milegi aur traffic ka nizam bhi behtar hoga, jabke mahkame bahami rabte ke sath masail ke hal ke iqdamat yaqeeni banayen.

Tasveer: Bashukriya DGPR Balochistan