Quetta mein ghair registered bachon ke formula doodh ke khilaf karrawaiyan, 14 giraftar, 575 kilo doodh zabt

Quetta: Chief Minister Balochistan ki hidayat aur Deputy Commissioner Quetta Mehrullah Badini ki nigrani mein zila intizamia aur muteallaqa idaron ne shehar mein ghair registered, ghair miyari aur ghair mujaz packing mein bachon ke formula doodh ki farokht ke khilaf khusoosi muhim jari rakhi hai.

Airport Road, Adda Sarki Road aur Bazar Area mein assistant commissioners, special magistrate aur food inspectors ki nigrani mein karrawaiyon ke dauran 14 afrad giraftar, 11 units seal aur majmooi taur par 575 kilogram ghair miyari o ghair registered formula doodh zabt kiya gaya.

Airport Road par 9 afrad giraftar, 6 units seal aur 250 kilogram doodh zabt hua. Bazar Area mein 2 afrad giraftar, 2 units seal aur 50 kilogram doodh zabt kiya gaya, jabke drug inspectors ki karrawai mein mazeed 150 kilogram formula doodh tehweel mein liya gaya.

Sarki Road Adda par karrawai

Assistant Commissioner o Special Magistrate Sariab Musawwir Ahmed Achakzai aur Special Magistrate Izzatullah ne Food Authority aur police ke hamrah Sarki Road Adda par karrawai ki, jahan 15 wholesale dukanon ka muaina kiya gaya, 2 afrad giraftar, 4 dukanein seal aur 125 kilogram ghair qanooni powder doodh zabt kiya gaya. Dukandaron ko food safety qawanin par amal-daramad aur ghair branded masnuaat ki farokht se gurez ki hidayat ki gayi.

Zila intizamia ke mutabiq bachon ki Sehat se mutaliq ghair registered aur ghair miyari formula doodh ke khilaf karrawaiyan mazeed tez ki jayengi aur khilaf-warzi karne walon ke khilaf bila-imtiaz qanooni karrawai hogi.

Tasveer: Bashukriya DGPR Balochistan