Quetta mein aate ki qeematon par ijlas, Flour Mills Association ki awam ko relief ke liye taawun ki yaqeen dehani

Quetta: Additional Deputy Commissioner (General) Muhammad Anwar Kakar ki zer-e-sadarat aate ki haliya qeematon ka jaiza lene aur awam ko relief faraham karne ke hawale se ijlas munaqid hua, jis mein Flour Mills Association, mukhtalif flour mills ke malikan, mehkama khorak aur mehkama sanat ke numainadon ne shirkat ki.

Ijlas mein mulk bhar mein aate ki maujooda qeematon, qeematon mein izafe ke awamil aur is se mutaliq mukhtalif pehluon par tafseeli tabadla-e-khayal kiya gaya, aur is baat par zor diya gaya ke awam ko aate ki munasib qeematon par faraahmi yaqeeni banane ke liye tamam mutaliqa idare bahmi taawun aur moasir hikmat-e-amli ke tahat iqdamat karein.

Flour Mills Association aur mills malikan ne awam ko relief faraham karne ke liye intizamia ke sath har mumkin taawun ki yaqeen dehani karai. Ijlas mein azm zahir kiya gaya ke mutaliqa mehkamon aur flour mills ke bahmi taawun se jald Quetta ke awam ko aate ki qeematon ke hawale se relief faraham karne ke liye amali iqdamat kiye jayenge.

Tasveer: Bashukriya DG PR Balochistan