Quetta: Deputy Commissioner Mehrullah Badini ki zer-e-sadarat DC office mein Khuli Kachehri, shehriyon ke masail sune gaye

Quetta: Wazir-e-aala Balochistan ki hidayat ki roshni mein Deputy Commissioner Quetta Mehrullah Badini ki zer-e-sadarat DC office complex mein Khuli Kachehri ka inqaad kiya gaya, jis mein shehriyon ne bharpoor shirkat karte hue apne masail aur shikayat pesh kin.

Khuli Kachehri mein tamam intizami afsaran samet gas, WAPDA, Safa Quetta, police, traffic police, Metropolitan Corporation, NADRA, PDMA, mehkama sehat, taleem, WASA, PHE, irrigation, Assistant Commissioners, tehsildaran aur deegar mutaliqa mehkamon ke afsaran shareek hue.

Shehriyon ne gas, bijli, local o domicile, revenue, NADRA aur deegar awami masail se mutaliq darkhwastein pesh kin. Deputy Commissioner Quetta ne moqe par hal hone wale masail ke fori izale ke ahkamat jari kiye, jabke deegar shikayat ke hal ke liye mutaliqa afsaran ko zaroori hidayat dete hue un par amal-daramad yaqeeni banane ki takeed ki.

Mehrullah Badini ne kaha ke Khuli Kachehriyon ke inqaad ka bunyadi maqsad awam ko un ki dehleez par relief faraham karna, sarkari mehkamon tak shehriyon ki rasai aasan banana aur un ke masail ka barwaqt hal yaqeeni banana hai.

Unhon ne mutaliqa afsaran ko hidayat ki ke awami shikayat ko sanjeedgi se liya jaye, ghair zaroori takheer se gurez kiya jaye aur tamam darkhwaston par merit ke mutabiq karrawai karte hue awam ko relief faraham kiya jaye.

Deputy Commissioner ne mazeed kaha ke zilai intizamia awami khidmat aur shehriyon ke masail ke hal ke liye purazm hai, aur is silsile mein tamam mutaliqa mehkamon ki karkardagi aur iqdamat ko mazeed mowassar banaya jaye ga.

Tasveer: bashukriya DGPR Balochistan