Qila Abdullah: Shaheed ASI Saadullah Khan ke lawahiqeen ko Shuhada Package ke tahat aik crore 22 lakh ka cheque

Qila Abdullah: Hukumat-e-Balochistan ki jaanib se 19 November 2025 ko Qabristan Chowki Qila Abdullah mein musallah afraad ki firing se shaheed hone wale police Assistant Sub Inspector (ASI) Saadullah Khan urf Doctor ke lawahiqeen ko Shuhada Package ke tahat aik crore 22 lakh rupay ka imdadi cheque de diya gaya.

Yeh cheque shaheed ke bete Jahangir Khan ko Deputy Commissioner Qila Abdullah Munawar Hussain Magsi, District Police Officer Khalil Ahmed Bugti aur Additional Deputy Commissioner Engineer Najmuddin Kibzai ki mojoodgi mein diya gaya. Is moqe par Awami National Party ke zilai sadr Malik Muhammad Hanif Achakzai, Pakistan PPP ke zilai sadr Nazar Muhammad Khan Kakar, Account Officer Faisal Khan, Inspector Habibullah Khan, Kakozai qaum ke motabareen aur shaheed ke bhai Muhammad Hanif aur Saifullah bhi mojood the.

Deputy Commissioner Munawar Hussain Magsi ne kaha ke mulk, qaum aur awam ke jaan o maal ke tahaffuz ke liye jaanon ka nazrana pesh karne wale shuhada ki qurbaniyan hamesha yaad rakhi jaen gi. Shaheed Saadullah Khan ne faraiz-e-mansabi ki adaigi ke dauran awam ke tahaffuz aur Aman o Aman ke qiyam ke liye jaan qurban ki, jo aik azeem qaumi khidmat hai.

Muqarrireen ne kaha ke police ke jawan Aman o Aman aur awam ke tahaffuz ke liye bemisaal qurbaniyan de rahe hain aur shuhada ke khandanon ki falah o behbood ke liye hukumat aur mutaliqa idaray apna kirdar jaari rakhen ge. Shaheed ke ahl-e-khana ne imdadi package par Hukumat-e-Balochistan, zilai intizamia aur police hukkam ka shukriya ada kiya, jabke qabaili omaaidin ne aman aur mulk o qaum ki khidmat ke liye kirdar jaari rakhne ke azm ka izhar kiya.

Tasveer: Bashukriya DG PR Balochistan