Punjab mein 13 se 17 September tak dafa 144 nafiz, ijtimaat aur muzahiron par pabandi

Mahkama dakhila Punjab ki janib se pabandiyon ka baqaida notification jari kar diya gaya. Mahkama dakhila ke mutabiq qanoon nafiz karne wale idaron aur intelligence agencies ki janib se intehai hassas reports mausool hui hain, jin mein kalad’dam dahshatgard tanzeemon ki janib se awami ijtimaat aur rallyon ko nishana banane ki mansooba bandi ki nishandehi ki gayi hai.

Notification ke mutabiq soobe mein kisi bhi awami maqam, shahrah ya khuli jagah par 5 ya is se zaid afraad ke ikattha hone, jaloos nikalne, jalse, dharne aur muzahire karne par pabandi hogi.

Awami maqamat par har qism ke hathiyar le jane aur un ki numaish par bhi mukammal pabandi aid ki gayi hai, jabke ghair qanooni ijtimaat, rallyon ya muzahiron mein shirkat ke liye logon ko uksane ya targheeb dene walon ke khilaf bhi qanooni karrawai ki jaye gi.

Mahkama dakhila ke mutabiq pabandi ka itlaq masajid aur deegar ibadatgahon, namaz-e-janaza, tadfeen aur shadi biyah ki taqreebat par nahin hoga, adalatein, hukumati idare aur baqaida intizami ijazat namay (NOC) ke baad munaqid hone wali taqreebat bhi pabandi se mustasna hon gi.

Duty par mamoor qanoon nafiz karne wale idaron, intelligence agencies aur security forces ke ahalkar bhi in pabandiyon se mustasna hon ge.

Tarjuman mahkama dakhila ke mutabiq awam ke jaan o maal ka tahaffuz hukumat Punjab ki awwalin tarjeeh hai, pabandiyon ka bunyadi maqsad mumkina na-khushgawar waqiat ki rok tham aur soobe mein aman o sukoon barqarar rakhna hai.