Punjab ke 239 sarkari hospitals ka fire safety audit mukammal, 710 mein se 691 hydrants nasb

Lahore (Atemad Desk): Punjab ke 239 sarkari hospitals ka fire safety audit mukammal kar liya gaya hai, jin mein 56 tertiary care, 41 district headquarter aur 142 tehsil headquarter hospitals shamil hain.

Audit report ke mutabiq hospitals mein tajweez kardah 710 fire hydrants mein se 691 nasb ho chuke hain; Lahore aur Rawalpindi division mein tansib 100 fisad mukammal hai, jabke Faisalabad mein 89 mein se 86 aur Bahawalpur mein 69 mein se 61 hydrants lagaye gaye hain.

Safety managers wale hospitals ki tadad 157 se barh kar 225 ho gayi hai aur 56 tertiary hospitals mein safety managers 29 se barha kar 44 kar diye gaye hain. 212 hospitals ko Tajawuzat se pak kiya gaya, fire extinguishers ki dastiyabi 233 se 238 hospitals tak pahunch gayi aur first aid box aur fire escape mask rakhne wale hospitals 149 se barh kar 216 ho gaye.

Report ke mutabiq doosre fire safety audit mein tamam 7 hifazati paimanon par behtri samne aayi, tahum hospitals mein hifazati intezamat ko mazeed muassir banane ki zarurat barqarar hai.