Police Line Khuzdar mein Youm-e-Difa ki taqreeb, Commissioner Qadir Bakhsh Parkani ne yaadgar-e-shuhada par phool chadhaye

Khuzdar: Mulk bhar ki tarah zila Khuzdar mein bhi 6 September Youm-e-Difa Pakistan aqeedat o ehtram aur qaumi jazbe se manaya gaya. Is silsile mein Police Line Khuzdar mein purwaqar taqreeb munaqid hui jahan police ke chaq o chobund dastay ne sabz hilali parcham ko salami pesh ki.

Baad azan Commissioner Khuzdar Division Qadir Bakhsh Parkani, Commandant Kalat Scouts Colonel Irfan Bangash, Deputy Commissioner Khuzdar Abdul Razzaq Sasoli aur SSP Khuzdar Dostain Dashti ne yaadgar-e-shuhada par phool chadhaye aur shuhada ke liye khusoosi dua ki.

Muqarireen ne 6 September 1965 ki tareekhi ahmiyat par roshni dalte hue kaha ke is din Pakistani qaum aur Pak Afwaj ne dushman ke napak azaim nakam bana kar jurat, bahaduri aur qurbaniyon ki tareekh raqam ki, aur inhi qurbaniyon ke baais aaj Pakistan aik mazboot aur mehfooz mulk hai. Unhon ne kaha ke shuhada qaum ke hero hain aur qaum unki qurbaniyon ko hamesha yaad rakhegi.

Taqreeb ke ikhtitam par mulk o qaum ki salamati, taraqqi, istehkam aur shuhada ke darjat ki bulandi ke liye khusoosi dua ki gayi.

Tasveer: Bashukriya DGPR Balochistan