Pishkan mein Mahigeeron ki kashtiyon ki registration, inspection aur paimaish ka amal jari, license ka ijra tez

Gwadar: Soobai hukumat ki Mahigeer dost policy ke tahat Pishkan aur gardonawah mein Mahigeeron ko sahuliyat ki faraahmi ka amal tez kar diya gaya hai, jahan kashtiyon ki registration, inspection aur paimaish ka amal jari hai aur mahigiri ke license ke ijra ke liye iqdamat kiye ja rahe hain.

DG Fisheries Atiqullah Khan ki hidayat par Assistant Director Fisheries Noorudin Hasni ki nigrani mein field teams kashtiyon ka muaina kar rahi hain aur un ki sakht, size, engine aur zaroori dastaweezat ki jaanch partaal ki ja rahi hai. Inspection aur tasdeeq ke baad ahal kashtiyon ko registration number jari kiye jayenge, jabke muqarrara qawaid ke tahat ahal Mahigeeron ko license jari kiye ja rahe hain.

Fisheries Department ne Mahigeeron se appeal ki hai ke muqarrara muddat mein apni kashtiyon ki registration aur inspection mukammal karayen. Mahkame ke mutabiq Mahigeeron ko sahulat, shafafiyat aur aasani faraham karna us ki tarjih hai, qanooni registration aur licensing se mahigiri ka shobah mazeed munazzam hoga aur Mahigeer dost iqdamat ke zariye maqami Mahigeeron ke mufadat ka tahaffuz yaqeeni banaya ja raha hai.

Tasveer: Bashukriya DG PR Balochistan