PCB Talent Hunt: Kech mein Inter Schools Cricket Tournament ka iftetah, 12 schools ki teemein shareek

Turbat: Pakistan Cricket Board (PCB) ke Talent Hunt programme ke tehat zila Kech mein Inter Schools Cricket Tournament ka baqaida iftetah kar diya gaya. Iftetahi taqreeb ke mehman-e-khusoosi Deputy Commissioner Kech Yasir Iqbal Dashti the.

Taqreeb mein PCB Quetta Region ke sadr o tournament ke sarparast-e-aala Shahdost Dashti, District Education Officer Kech Amjad Shahzad, District Cricket Association Kech ke sabiq sadr Abdul Rahim Baloch, Sports Officer Kech Ghaffar Yousaf, Sports Officer Tump Habib Murad, All Makuran Tajir Ittehad ke sadr Ishaq Roshan Dashti, Anjuman-e-Tajiran Kech ke chairman Ghulam Azam Dashti, Jamal Marri samet siyasi, samaji, taleemi aur khelon se wabasta shakhsiyat ne shirkat ki.

Iftetahi match Delta School Turbat aur Kech Grammar School ke darmiyan khela gaya, jis mein khilariyon ne umda khel ka muzahira kiya. Tournament mein zila Kech ke 12 sarkari o nijee schools ki teemein hissa le rahi hain, jin mein 8 sarkari aur 4 nijee school shamil hain.

Kech mein Cricket Academy ka elan

Deputy Commissioner Yasir Iqbal Dashti ne kaha ke nau jawanon mein mojood khelon ke talent ko talash kar ke nikharne aur munasib mawaqe faraham karne ki zaroorat hai, aur PCB Talent Hunt programme school satah ke khilariyon ke liye salahiyaton ke izhar ka aham platform hai. Unhon ne Shahdost Dashti aur muntazimin ki kawishon ko saraha aur kaha ke zilai intizamia nau jawanon ko khelon ke liye behtar mahaul aur sahuliyat ki faraahmi ke liye dastiyab wasail baroye kaar la rahi hai.

District Education Officer Amjad Shahzad ne kaha ke schools mein khelon ke farogh se talaba mein nazm o zabt, team work aur sehat mand musabiqat ka jazba paida hota hai. Shahdost Dashti ne kaha ke tournament ka maqsad Kech ke schools ke basalahiyat cricketers ko samne lana hai aur merit par numayan khilariyon ko qaumi satah par mawaqe faraham karne ki koshish ki jaye gi. Unhon ne Kech mein Cricket Academy ke qiyam par bhi kaam karne ka elan kiya taake nau jawanon ko maqami satah par coaching, tarbiyat aur sahuliyat muyassar aa sakein.

Abdul Rahim Baloch ne kaha ke PCB Talent Hunt programme door daraz ilaqon ke nau jawan cricketers ko apni salahiyaten manwane ka aham mauqa faraham kar raha hai aur aise tournaments ka tasalsul zaroori hai. Iftetahi taqreeb ke dauran commentator Nisar DC ne barjasta commentary ke zariye taqreeb ko dilchasp banaye rakha.

Tasveer: bashukriya DGPR Balochistan