Panjgur mein DICC ijlas, Aman o Aman aur Afghan shehriyon ki mulk badri par ghaur

Panjgur: Deputy Commissioner Panjgur Abdul Kabeer Zarkoon ki sadarat mein District Intelligence Coordination Committee (DICC) ka aham ijlas Deputy Commissioner Office Panjgur mein munaqid hua. Ijlas mein mukhtalif intelligence idaron aur qanoon nafiz karne wale mahkamon ke numainde ne shirkat ki.

Ijlas ka maqsad zila Panjgur mein Aman o Aman ki mujmui surat-e-haal ka jaiza lena, ilaqai security ko mazeed mouassar banana aur Afghan shehriyon ki mulk badri ke amal ko marboot tareeqe se aage barhana tha. Shurka ne zile mein maujood challenges aur un ke hal se mutaliq mukhtalif tajaweez pesh kin.

Deputy Commissioner ne kaha ke zilai intizamia Aman o Aman ki bahali ke liye har waqt chaukas hai aur tamam idare baahmi rabte ke zariye behtar nataij ke liye kaam kar rahe hain.

Unhon ne kaha ke qanoon ki amaldari, shehriyon ke jaan o maal ka tahaffuz aur ghair qanooni sargarmiyon ki rok tham zilai intizamia ki awwaleen tarjihat mein shamil hai.

Akhir mein Deputy Commissioner ne tamam mutaliqa idaron ke afsaran ko hidayat ki ke baahmi taawun ko mazeed mazboot banaya jaye aur kisi bhi mushtabah sargarmi ki fori itla mutaliqa idaron ko di jaye taake zile mein derpa aman o istehkam ko yaqeeni banaya ja sake.