Ormara: Drug inspector Gwadar ka medical stores ka achanak muaina, do stores ko show-cause notice jari

Ormara: Soobai hukumat ki sehat-e-aamma policy aur adwiyat ke miyar se mutaliq hidayat ki roshni mein drug inspector Gwadar Dr Muhammad Asif ne Ormara mein mukhtalif medical stores ka achanak muaina kiya.

Muaine ke dauran drug license, warranty o kharidari bills, adwiyat ki expiry, storage ke munasib intezamat aur safai suthrai ka jaiza liya gaya. Baaz adwiyat ke namoonay mazeed tajziye ke liye laboratory bhijwa diye gaye, jabke zaroori islahat ki hidayat karte hue khilaf warzi par do medical stores ko show-cause notices jari kiye gaye.

Drug inspector ne medical store malikan ko hidayat ki ke adwiyat ki kharid, zakhira aur farokht mein muqarrara qawanin o zawabit par mukammal amalderamad yaqeeni banaya jaye taake shehriyon ko mehfooz, miyari aur muassir adwiyat mil sakein. Medical stores ki nigrani aur achanak inspection ka silsila jari rakhne par bhi zor diya gaya.

Tasveer: Bashukriya DG PR Balochistan