Naseerabad: Hifazati Teeka Jat ka mahana jaiza, Deputy Commissioner Virender Lal ki mehroom bachon ki nishandehi ki hidayat

Naseerabad: Deputy Commissioner Naseerabad Virender Lal ki zer-e-sadarat bachon ke Hifazati Teeka Jat ke hawale se mahana jaiza ijlas munaqid hua, jis mein mehkama Sehat ke afsaran aur mutaliqa hukkam ne shirkat ki.

Ijlas mein zila mein bachon ko mukhtalif bimariyon se mehfooz rakhne ke liye jari Hifazati Teeka Jat ke program, vaccination coverage, field sargarmiyon aur darpesh masail ka tafseeli jaiza liya gaya aur mutaliqa afsaran ne Deputy Commissioner ko briefing di.

Virender Lal ne kaha ke bachon ko barwaqt hifazati teeke lagwana un ki sehat aur mehfooz mustaqbil ke liye intehai zaroori hai, is liye mehkama Sehat ke afsaran aur vaccination teams apni zimmedariyan poori mehnat se anjam dein. Unhon ne hidayat ki ke door daraz ilaqon samet tamam union councils mein Teeka Jat ki sahulat yaqeeni banayi jaye aur kisi bhi wajah se vaccination se mehroom reh jane wale bachon ki nishandehi ki jaye.

Deputy Commissioner ne kaha ke walidain mein Hifazati Teeka Jat ke bare mein shaoor ujagar karne ke liye agahi sargarmiyan mazeed mooassir banayi jayen taake koi bacha zaroori vaccine se mehroom na rahe. Ijlas mein program ko mazeed mooassir banane aur muqarrara ahdaf ke husool ke liye mukhtalif iqdamat par bhi ghaur kiya gaya.

Tasveer: Bashukriya DGPR Balochistan