Naseerabad Division: Lady Medical Officers aur Staff Nurses ki 23 aasamiyon ke liye interviews

Naseerabad: Naseerabad Division mein mehkama Sehat ki afradi quwwat ko mustahkam banane ke liye Chief Minister Balochistan Mir Sarfraz Bugti ke vision aur Chief Secretary Shakeel Qadir Khan ke ahkamat ki roshni mein bharti ke doosre marhale mein Lady Medical Officers aur female Staff Nurses ki khali aasamiyon par umeedwaron ke interviews kiye gaye.

Divisional Health Committee ke chairman o Commissioner Naseerabad Division Salahuddin Nurzai ki nigrani mein Lady Medical Officers ki 19 aur female Staff Nurses ki 4 aasamiyon ke umeedwaron ki taleemi asnaad, tajurbe aur deegar dastawezat ki jaanch partal ki gayi, jabke committee arakin ne umeedwaron se sawalat karke un ki pesha warana salahiyat aur ehliyat ka jaiza liya.

Is moqe par Deputy Commissioner Sohbatpur Farida Tareen, Divisional Director Health Dawood Khan Kansi, MS Dr Habib Pandrani aur Divisional Health Committee ke deegar arakin maujood the.

Commissioner Salahuddin Nurzai ne kaha ke mehkama Sehat mein khali aasamiyon par merit aur shafafiyat ke sath bharti ka amal jari hai, jis ka maqsad tibbi markaz mein afradi quwwat behtar banana aur awam ko un ki dehleez par miyari tibbi sahuliyat faraham karna hai. Unhon ne kaha ke khawateen ke liye tibbi khidmat mein Lady Medical Officers aur Staff Nurses ka kirdar intihai aham hai aur in taqarruriyon se khusoosan khawateen aur bachon ko behtar tibbi sahuliyat milengi.

Tasveer: bashukriya DGPR Balochistan