Naseerabad Division ke sarkon ke mansoobe PC-1 ke mutabiq mukammal kiye jayenge: Commissioner Salahuddin Noorzai

Naseerabad: Commissioner Naseerabad Division Salahuddin Noorzai ne kaha hai ke Chief Minister Balochistan Mir Sarfraz Bugti aur Chief Secretary Balochistan Shakeel Qadir Khan ke ahkamat ki roshni mein Naseerabad Division mein sarkon ke taraqqiyati mansoobon ko PC-1 ke mutabiq mukammal karne ke liye divisional intizamiya tamam dastiyab wasail beroye kaar laye gi aur Communication and Works Department roads ke engineers ko mukammal moaawanat faraham karte hue jari mansoobe muqarrara muddat mein mukammal karwaye jayenge taake awam in iqdamat se bharpoor istifada kar saken.

Woh Communication and Works roads ke jari taraqqiyati mansoobon aur darpesh masail ke jaize ke liye munaqida ijlas ki sadarat kar rahe the. Ijlas mein Superintending Engineers Fida Hussain Khosa aur Arsala Rind, Project Director Sohbatpur Kashmore Road Zafar Khosa, Executive Engineers Abdul Sattar Bangulzai, Bostan Khan Chandio, Mujeeb ur Rehman Hashmi, Ghulam Dastageer Zehri, Sub Divisional Officers Nadir Ali Pahnwar aur Bashir Shah samet deegar officers maujood the, jinhon ne apne apne Azla mein jari mansoobon ki pesh raft aur masail par briefing di.

Commissioner ne hidayat ki ke jo mansoobe takmeel ke marahil mein dakhil ho chuke hain unhein mazeed takheer ke baghair mukammal kiya jaye aur kisi mansoobe ko khatai mein na parne diya jaye. Unhon ne kaha ke sarkon ke mansoobon ki barwaqt takmeel awam ke wasee tar mufad mein hai aur is se mehkame ki karkardagi aur morale bhi wabasta hai.

Unhon ne officers ko hidayat ki ke taraqqiyati mansoobon ke funds samet deegar masail se hukkam-e-bala ko baqaidagi se tehreeri taur par agah karte rahen taake barwaqt iqdamat karke rukawatein door ki ja saken.

Tasveer: bashukriya DGPR Balochistan