Naseerabad: District Education Committee ka ijlas, ghair hazir asatiza ke khilaf bila imtiaz karrawai ka faisla

Naseerabad: Deputy Commissioner Naseerabad Virender Lal ki zair-e-sadarat District Education Committee ka aham ijlas munaqid hua, jis mein zila ke taleemi idaron mein tadrisi amal ki behtari, asatiza aur deegar mulazimeen ki hazri, darpesh masail, talaba ko miyari taleemi sahuliyat ki faraahmi aur ghair hazir mulazimeen ke khilaf bila imtiaz karrawai samet mukhtalif umoor ka jaiza liya gaya.

Ijlas mein tadrisi sargarmiyon ko moassir banane, asatiza ki hazri yaqeeni banane aur talaba ko behtar taleemi mahaul faraham karne ki tajaweez par ghaur kiya gaya aur nazm-o-zabt barqarar rakhne aur tadrisi amal mein ghaflat bardasht na karne par zor diya gaya.

Deputy Commissioner Virender Lal ne kaha ke jadeed aur miyari taleem ke baghair kisi muashre aur mulk ki haqiqi taraqqi mumkin nahin aur taraqqi yafta mumalik ki saf mein shamil hone ke liye taleem ke shobe mein numayan pesh raft karna hogi. Unhon ne kaha ke asatiza muashre ke memar hain jin ki zimmedari nisabi taleem ke sath talaba ki akhlaqi tarbiyat aur kirdar sazi bhi hai.

Unhon ne hidayat ki ke tamam sarkari taleemi idaron mein asatiza aur amle ki hazri yaqeeni banai jaye aur ghair hazir mulazimeen ke khilaf qawaid ke mutabiq bila imtiaz karrawai ki jaye. Unhon ne kaha ke sarkari wasail awam ki amanat hain, faraiz se ghaflat kisi surat qabil-e-qabool nahin, aur zilai intizamia taleem ke farogh ke liye har mumkin taawun faraham karegi.

Tasveer: bashukriya DGPR Balochistan