Musakhel: Commissioner Loralai Wali Muhammad Barech ki Khuli Kachehri, Kingri filter plant bahal karne aur maweshi camps lagane ka hukum

Musakhel: Commissioner Loralai Division Wali Muhammad Barech ki zer-e-sadarat zila Musakhel mein awami masail ke hal aur awam ko un ki dehleez par relief ki faraahmi ke liye Khuli Kachehri ka inqaad kiya gaya, jis mein awam ki badi tadad ne shirkat ki.

Shehriyon, zamindaron, umaaidin aur mukhtalif shobah haye zindagi se talluq rakhne wale afraad ne apne masail aur shikayat barah-e-raast commissioner ke samne pesh kin.

Awami shikayat aur BSDI par tahaffuzat

Awam ne khasta haal aur kachi sadkon, sarkari imaraton ki abtar halat, peene ke saaf pani ki adam dastyabi, abnoshi ki schemes, mehkama PHE, B&R aur deegar mehkamon ki karkardagi se mutaalliq mutaddid shikayat pesh kin.

Awam ne Balochistan Special Development Initiative (BSDI) programme ke hawale se bhi tahaffuzat ka izhar kiya. Shurka ne shikayat ki ke zila Musakhel mein BSDI projects ko sirf do tehsilon tak mehdood rakha gaya hai, jabke deegar ilaqon ko taraqqiyati projects se mehroom rakha ja raha hai.

Awam ne schemes ki taqseem mein mubayyina janibdari aur sifarishi bunyadon par projects ke intikhab se bhi commissioner ko agah kiya aur mutalba kiya ke taraqqiyati projects ki manzoori zarurat, abadi, pasmandagi aur awami mufad ko madde nazar rakhte hue shaffaf bunyadon par ki jaye.

Commissioner Wali Muhammad Barech ne shikayat ghaur se sunin aur mutaalliqa mehkamon ke afsaran ko hidayat ki ke awami masail ke hal mein kisi qism ki ghaflat aur takheer bardasht nahin ki jaye gi. Unhon ne wazeh kiya ke taraqqiyati projects ke samrat bila imtiaz tamam ilaqon tak pohanchana intizamia ki zimmedari hai aur awami mufad ko har surat muqaddam rakha jaye ga.

Khuli Kachehri mein baaz aise mareez bhi shareek hue jo mukhtalif mozi amraz mein mubtala the. Unhon ne commissioner se ilaj mualaje aur maali muaawanat ki darkhwast ki. Commissioner ne un ki mushkilat sunin aur mutaalliqa hukkam ko dastiyab wasail ke andar rehte hue zaroori muaawanat aur ilaj ki sahuliyat ki faraahmi ke liye iqdamat ki hidayat ki.

Zamindaran Action Committee Musakhel ke sadr Haji Ismat ne Zaraat se mutaalliq MMD ke record ka mamla uthaya. Unhon ne bataya ke guzishta kai salon ka record dastyab nahin, jis se zamindaron ko mushkilat ka samna hai. Commissioner ne notice lete hue mutaalliqa hukkam se record ki surat-e-haal maloom karne aur masle ke hal ke liye zaroori iqdamat ki hidayat ki.

Maweshi pal hazrat aur filter plant

Khuli Kachehri mein maal maweshi ke ilaj mualaje aur adwiyat ki adam dastyabi ka masla bhi tafseel se zer-e-behas aya. Awam ne bataya ke zila Musakhel mein lakhon ki tadad mein maal maweshi mojood hain, taham khusoosan tehsil Kingri mein maweshiyon ke ilaj aur adwiyat ki sahuliyat na hone ke barabar hain, jis ke baais maweshi pal afraad ko shadeed mushkilat ka samna hai.

Commissioner ne fori notice lete hue mehkama livestock ko hidayat ki ke zila Musakhel ki tamam tehsilon mein maal maweshiyon ke ilaj, vaccination aur adwiyat ki faraahmi ke liye veterinary medical camps ka inqaad kiya jaye taake maweshi pal afraad ko un ki dehleez par ilaj ki sahulat muyassar aa sake.

Awam ne mehkama PHE ki baaz schemes ke kharab aur ghair faal hone ki bhi shikayat kin. Khas taur par Kingri bazar ke water filter plant ki bandish ka masla pesh kiya gaya, jis par commissioner ne PHE ke XEN ko hidayat ki ke Kingri bazar water filter plant ko fori taur par bahal karke awam ko saaf peene ke pani ki faraahmi yaqeeni banai jaye.

Isi tarah mehkama B&R ke tameeraati projects, khasta haal sadkon aur baaz ilaqon mein mutaalliqa afsaran ki adam mojoodgi se mutaalliq bhi awam ne shikayat darj karain. Commissioner ne hidayat ki ke sadkon aur sarkari tameeraat ke kamon ki baqaidagi se nigrani ki jaye, miyar par samjhauta na kiya jaye aur field mein afsaran ki mojoodgi yaqeeni banai jaye.

Commissioner Loralai Division ne kaha ke Khuli Kachehrion ka bunyadi maqsad awam aur intizamia ke darmiyan barah-e-raast rabta qaim karna, masail ko mauqe par sunna aur un ke hal ke liye fori iqdamat karna hai. Unhon ne kaha ke hukumat Balochistan awam ko bunyadi sahuliyat ki faraahmi, pasmanda ilaqon ki taraqqi aur awami shikayat ke izaale ke liye sanjeeda iqdamat kar rahi hai.

Unhon ne afsaran ko hidayat ki ke Khuli Kachehri mein samne aane wale masail ko mehaz karrawai tak mehdood na rakha jaye balke har shikayat par amali pesh raft yaqeeni banai jaye aur awam ko relief faraham kiya jaye. Unhon ne kaha ke intizamia ki karkardagi ka asal maqsad awam ko sahuliyat ki faraahmi aur un ke masail ka ba-waqt izala hai.

Khuli Kachehri ke ikhtitam par awam ne masail sunne aur mutaddid masail par fori ahkamat jari karne ko sarahte hue umeed zahir ki ke mutaalliqa mehkame commissioner ki hidayat par fori amal daramad yaqeeni banayen ge.

Tasweer: Bashukriya DGPR Balochistan