Mir Ghulam Qadir Bugti ki daswin barsi Pakistan House Sui mein manai gayi, Chief Minister Sarfraz Bugti ka khiraj-e-aqeedat

Sui: Buzurg siyasi o qabaili rehnuma, ilm o shaoor ke alambardar aur siyasi o samaji bedari ke farogh ke liye numayan khidmaat anjam dene wale Mir Ghulam Qadir Bugti marhoom ki daswin barsi Pakistan House Sui mein aqeedat o ehtiram se manai gayi.

Is mauqe par Chief of Bugti o Chief Minister Balochistan Mir Sarfraz Bugti ke chhote bhai aur marhoom ke chhote sahabzade Mir Aftab Khan Bugti, Wadera Muhammad Bakhsh Mondrani, Mir Ataullah Kalpar, Wadera Shah Murad Khan Masori, Mir Jamal Khan Kalpar samet siyasi o qabaili umaidin aur awam ki kaseer tadad ne shirkat ki.

Taziyati reference mein shurka ne marhoom ki siyasi o samaji khidmaat, usool pasandi, khuddari, ilm dosti aur jamhuri jaddojehad ko khiraj-e-aqeedat pesh kiya. Muqarrirein ne kaha ke un ki jaddojehad aur khidmaat aaj bhi nayi nasl ke liye mash’al-e-rah hain. Marhoom ke eisal-e-sawab aur darajaat ki bulandi ke liye khusoosi dua ki gayi aur shurka mein langar taqseem kiya gaya. Pakistan House Sui ke ilawa Bekhtar, Lotti aur deegar maqamat par bhi taziyati references aur duaiya ijtimaat munaqid hue.

«Mere pehle ustad aur rehnuma»

Chief Minister Balochistan Mir Sarfraz Bugti ne apne walid ko khiraj-e-aqeedat pesh karte hue kaha ke Mir Ghulam Qadir Bugti ne ilm, shaoor aur siyasi o samaji bedari ke farogh mein aham kirdar ada kiya aur un ki zindagi usool pasandi, khuddari, ilm dosti aur apne logon ki khidmat se ibarat thi.

Unhon ne kaha ke «Mir Ghulam Qadir Bugti mere walid hi nahin balke mere pehle ustad, rehnuma aur zindagi mein meri fikri tarbiyat karne wali azeem shakhsiyat the, unhon ne mujhe mushkil halat mein sabit qadam rehne, usoolon par qaim rehne aur apne logon ki khidmat ka dars diya». Chief Minister ne kaha ke unhein bichhde das baras guzar gaye magar un ki yaadein, afkar aur tarbiyat aaj bhi dilon mein zinda hain, aur un ki roshan fikr miras ko aage barhana hum sab ki zimmedari hai.

Tasveer: Bashukriya DG PR Balochistan