Mayor Turbat Balakh Sher Qazi ka Dashti Bazar primary school ka daura, chardiwari aur naye classrooms banane ka wada

Turbat: Municipal Corporation Turbat ke mayor Balakh Sher Qazi ne Government Boys Primary School Dashti Bazar Turbat ka daura kiya, jahan school ke asatiza aur staff ne un ka istiqbal kiya. Is mauqe par ADEO Turbat Master Muhammad Iqbal Baloch aur Kech Bar Association ke sabiq sadr o PTSMC ke rukn Haji Rustam Gichki advocate samet deegar afrad maujood the.

Haji Rustam Gichki advocate ne mayor ko school ko darpesh mukhtalif masail se agah kiya. Mayor Balakh Sher Qazi ne masail ke hal ki yaqeen dehani karate hue school ki chardiwari aur naye classrooms ki tameer ke liye iqdamat ka wada kiya.

Mayor ne mukhtalif classrooms ka daura kiya aur talba se sawalat bhi kiye. Unhon ne asatiza ki karkardagi par itminan ka izhar karte hue kaha ke woh school ki zaruriyat poori karne ki koshish karenge. Is mauqe par asatiza Fahad Hussain, Ehsan, Nisar Ahmed aur Karim Jan bhi maujood the.

Tasveer: Bashukriya DGPR Balochistan